നിലവിലെ സംരംഭകർക്കും സംരംഭ മേഖലയിലേക്ക് കടന്നുചെല്ലാൻ ആഗ്രഹിക്കുന്ന പുതിയ ഓക്സിലറി ഗ്രൂപ്പ് അംഗങ്ങൾക്കും ആവേശം പകർന്ന് കുടുംബശ്രീ ജെൻ നെക്സ്റ്റ് സമ്മിറ്റ്-2025 ഓപ്പൺ ഫോറം ശ്രദ്ധേയമായി. ‘കുടുംബശ്രീ ഓക്സിലറി ഗ്രൂപ്പുകളും നൂതന സംരംഭ ബിസിനസ് സാധ്യതകളും’ എന്ന വിഷയത്തിൽ സംഘടിപ്പിച്ച ഓപ്പൺ ഫോറത്തിലാണ് വിവിധ സംരംഭ ആശയങ്ങളും സാധ്യതകളും ഉയർന്നത്.

പ്ളാനിങ്ങ് ബോർഡ് അംഗം ജിജു പി.അലക്സ്, സ്റ്റാർട്ടപ് മിഷൻ ചീഫ് എക്സിക്യൂട്ടീവ് ഓഫീസർ അനൂപ് അംബിക, യുവ സംരംഭകരായ  അനു അഷോക്, ഷാന നസ്റിൻ എന്നിവരാണ് ഓപ്പൺ ഫോറത്തിൽ പങ്കെടുത്തത്. കാർഷിക സൂക്ഷ്മസംരംഭ മേഖലയിൽ തുടങ്ങാനാകുന്ന സംരംഭങ്ങൾ, ആധുനിക സാങ്കേതിക വിദ്യകൾ ഉപയോഗിച്ചുള്ള മൂല്യവർധിത ഉൽപന്ന നിർമാണം, ഇതരമേഖലയിലെ നൂതന സംരംഭങ്ങൾ എന്നിവ സംബന്ധിച്ച നൂതന ആശയങ്ങളും സംവാദങ്ങളും ഓപ്പൺ ഫോറം സജീവമാക്കി. സംരംഭം തുടങ്ങുന്നതിനുള്ള ആശയ രൂപീകരണം, മുതൽ ഉൽപന്ന നിർമാണം, വിപണനം, മാർക്കറ്റിങ്ങ്, വരുമാന സുസ്ഥിരത തുടങ്ങി വിവിധ മേഖലകളിൽ  പ്രൊഫഷണലിസവും സമർപ്പണ ബോധവും പുലർത്തേണ്ട അനിവാര്യതയെ കുറിച്ച് ഓപ്പൺഫോറത്തിൽ പങ്കെടുത്തവർ പറഞ്ഞു.  വിവിധ സർക്കാർ വകുപ്പുകൾ വഴി സ്റ്റാർട്ടപ്പുകൾക്കും മറ്റു സംരംഭങ്ങൾക്കും ലഭ്യമാകുന്ന സേവനങ്ങളും പിന്തുണകളും പരിപാടിയിൽ പങ്കു വച്ചു.

വെല്ലുവിളികളെ അവസരങ്ങളാക്കി മാറ്റുകയാണ് വേണ്ടതെന്ന അഭിപ്രായവും ഓപ്പൺ ഫോറത്തിൽ ഉയർന്നു. വിവിധ സംരംഭങ്ങൾ നടത്തുന്ന അംഗങ്ങളുടെ സംശയങ്ങൾക്കും പാനൽ അംഗങ്ങൾ മറുപടി പറഞ്ഞു. എറണാകുളം ജില്ലയിൽ നിന്നുള്ള ഓക്സിലറി ഗ്രൂപ്പ് അംഗവും റിസോഴ്സ് പേഴ്സണുമായ ജ്യോതി മോഡറേറ്ററായി.