റബര് കൃഷി മേഖലയിലെ തൊഴിലാളി ക്ഷാമത്തിന് ശ്വാശ്വത പരിഹാരം, റബര് കര്ഷകര്ക്ക് സമഗ്ര സേവനം ഉറപ്പാക്കുക എന്നീ ലക്ഷ്യങ്ങളോടെ റബര് കാര്ഷിക കര്മ്മസേനയുമായി കുടുംബശ്രീ കോട്ടയം ജില്ലാ മിഷന്. മേലുകാവ് പഞ്ചായത്തിലാണ് ഇവന്റ് മാനേജ്മെന്റ് രീതിയില് പ്രവര്ത്തിക്കുന്ന ഈ കര്മ്മസേനയ്ക്ക് പരീക്ഷണാടിസ്ഥാനത്തില് തുടക്കം കുറിച്ചിരിക്കുന്നത്.
റബര് തോട്ടങ്ങളുടെ പരിപാലനം ഏറ്റെടുത്ത് നടപ്പിലാക്കുന്നതിനായി 15 അയല്ക്കൂട്ടാംഗങ്ങളാണ് റബര് കാര്ഷിക കര്മ്മസേനയിലുള്ളത്. മേലുകാവ് സി.ഡി.എസിലെ വിവിധ അയല്ക്കൂട്ടങ്ങളില് നിന്നുള്ളവരാണിവര്. ടാപ്പിങ് ഉള്പ്പെടെയുള്ള എല്ലാ റബര് കൃഷി പരിപാലന പ്രവര്ത്തനങ്ങളും ഈ കര്മ്മസേന ഏകോപിപ്പിച്ച് നിര്വഹിക്കും. ഇതിലൂടെ തോട്ടം ഉടമകള്ക്ക് തൊഴിലാളികളെ കണ്ടെത്തുന്നതിനുള്ള ബുദ്ധിമുട്ട് ഒഴിവാകുകയും കൃഷിപരിപാലനത്തിന്റെ മുഴുവന് ഉത്തരവാദിത്വവും വിദഗ്ധ സംഘത്തിന് കൈമാറാനാവുകയും ചെയ്യും. തൊഴിലാളികള്ക്ക് സ്ഥിരതയുള്ള തൊഴിലും മാന്യമായ വേതനവും ഉറപ്പാക്കുന്നതോടൊപ്പം റബ്ബര് ഉല്പ്പാദനവും കര്ഷകരുടെ വരുമാനവും വര്ധിപ്പിക്കാനും പദ്ധതി സഹായകമാകും. കേരള റബ്ബര് ലിമിറ്റഡിന്റെ (കെ.ആര്.എല്) സാങ്കേതികവും സാമ്പത്തികവുമായ പിന്തുണയും പദ്ധതിക്കുണ്ട്.